Сайтка кириу

МӘМЛЕКЕТЛИК ХЫЗМЕТ КӨРСЕТИӮ. ӘҲМИЙЕТЛИ ҲҮЖЖЕТ БОЛДЫ

Көпшилик пуқараларымызды қыйнап киятырған мәселе, яғный, өзбасымшылық пенен қурылған турақ жайларға мүлк ҳуқықын бериӯде Өзбекстан Республикасы Министрлер Кабинетиниӊ «Өзбекстан Республикасы Президентиниӊ «Пуқараларды социаллық қоллап-қуӯатлаӯ бойынша қосымша ис-илажлар ҳәм де өзбасымшалық пенен қурылған турақ жайларға мүлк ҳуқықын бериӯ бойынша бир мәртелик улыӯма мәмлекетлик акциясын өткериӯ ҳаққында»ғы 2018-жыл 20-апрельдеги ПП-5421-санлы Пәрманыныӊ орынланыӯын тәмийинлеӯ ис-илажлары ҳаққында»ғы қарары әҳмийетли ҳүжжет болды.
Кегейли районы Мәмлекетлик хызметлер орайы тәрепинен райондағы мәҳәлле ҳәм аӯыл пуқаралар жыйынлары аймақларында жоқарыдағы Пәрманныӊ орынланыӯын тәмийинлеӯ мақсетинде ҳәр ҳәптеде үгит-нәсият жумыслары әмелге асырылмақта.
Бүгинге күнге келип, ҳуқықый үгит-нәсият жумыслары барысында район халқы менен 60 тан зыят ушырасыӯ ҳәм семинарлар шөлкемлестирилди. Сондай-ақ, көрсетилетуғын мәмлекетлик хызметлер бойынша мағлыӯматлар түсиникли, әпиӯайыластырылған ҳалда мәлимлеме бериӯши көплеген буклетлер үйме-үй жүрип тарқатылды. Илаж даӯамында анықланған мәмлекетлик хызметлерге байланыслы болған машқалаларды көшпели мәмлекетлик хызмет арқалы шешиӯ шаралары көрилди.
Әмелге асырылған үгит-нәсият жумыслары нәтийжесинде усы күнге щекем Мәмлекетлик хызметлер орайына ҳәкимниӊ жеке тәртипте турақ жай қурыӯ ушын жер участкасын ажыратыӯ ҳаққындағы қарары болмаған, өзбасымшалық пенен қурылған турақ жайға мүлк ҳуқықын бериӯ бойынша 452 пуқарадан мүрәжатлар қабыл етип алынған. Соннан 255 пуқараға өзбасымшалық пенен қурылған имратқа мүлк ҳуқықын бериӯ ҳәм де жер участкасына өмирлик ийелик етиӯ ҳуқықын бериӯ ҳаққында район ҳәкими қарарыныӊ қабыл етилиӯине ерисилди. Қалған мүрәжатлар болса районлық комисиия тәрепинен үйренип шығылмақта.

М.ҚУДАЙБЕРГЕНОВ,
Кегейли районы Мәмлекетлик хызметлер орайы бөлим баслығы.